Një episod i rëndë është shënuar në Sao Paolo të Brazilit, ku anëtarët e skuadrës së Mercedesit janë rrëmbyer e më pas grabitur nga një bandë e armatosur. Ngjarja ka ndodhur vetëm pak metra larg cirkuitit të Interlagos, ku ditën e dielë do të zhvillohet gara e fundit për këtë sezon, që tashmë e ka shpallur kampionin e saj. Dhe është pikërisht kampioni i botës për hërë të katërt Lewis Hamilton, ai që është shokuar më shumë nga të gjithë nga kjo ngjarje.
“Të gjithë janë të frikësuar në skuadrën tonë. Me të drejtë, pasi u kishin drejtuar në kokë armë të vërteta, janë kriminelë që nuk bëjnë shaka. Kjo ka ndodhur në të dalë të cirkutitit të Interlagos. U dëgjuan edhe të shtëna me armë. Këto skena ndodhin cdo vit në këtë vend, duke turbulluar ata që kërkojnë të jenë profesionistë edhe në kushte ekstreme. Drejtuesit e Formula 1 duhet të marrin masa urgjente. Për episode të tilla nuk ka justifikime,” – shkruan kampioni i Botës në “Tëitter”.
Gjithsesi, lajmi i mirë është se nuk ka të lënduar. Në vitin 2010, po në Sao Paolo, edhe Janson Button ka rënë pre e një sulmi të armatosur, të cilin ai ende sot e evokon si të tmerrshëm. Kjo nuk ishte mbyllja më e bukur që mund t’u bëhej garave të Formula 1.
