Barazimi 2-2 me Manchester Cityn nuk ishte rezultati që trajneri Jurgen Klopp priste nga skuadra e tij, por siç thekson vetë gjermani është një rezultat që duhet pranuar.
Duke folur pas supersfidës së javës së 32-të të Premier League, kreu i stolit të Liverpool theksoi se kjo përballje i ishte dukur si një ndeshje boksi.
“Ishte si një ndeshje boksi. Ndodhesh poshtë për një moment dhe merr një tronditje. Humbëm një mundësi të madhe, megjithatë janë ende dhe shumë ndeshje përpara. Ishte një ndeshje e bukur dhe një rezultat të cilin duhet ta pranojnë dhe me të cilin duhet të jetojmë. Ishte një ndeshje e egër, intensiteti i sfidës ishte i çmendur.”-theksoi Klopp.
Ndërsa kapiteni i “The Reds”, Jordan Henderson shtoi se Liverpool vijon të mbetet në garë për titullin kampion dhe sipas tij ata do të luftojnë deri në momentin e fundit.
“Nuk është fundi i botës. Ka gjëra pozitive dhe negative, por ne jemi ende në garën për titullin. Manchester City nuk humbet shumë pikë, por ne duhet të përqendrohemi te vetja jonë. Nëse ata rrëshqasin, ne duhet të jemi aty. Jemi pozitiv dhe do vazhdojmë të jemi deri në fund.”-theksoi Henderson.
