Barcelona vazhdon të bëjë përpara pa shumë zhurmë dhe klubi katalanas vijon të mbajë të gjalla shpresat për të kompletuar “tripletën”, mundësi që në të njëjtën kohë në kontinentin e vjetër e ka gjithashtu edhe ekipi i Ajaxit të Amsterdamit. Të udhëhequr nga Lionel Messi futbollistët e skuadrës blaugrana futën menjëherë në librin e rekordeve trajnerin e ri të Manchester United Ole Gunnar Solksjaer, duke i shkaktuar “Djajve të Kuq” humbjen 4-0 në rezultatin e përgjithshëm të dy ndeshjeve, disfata më e rëndë në fazën me eliminim të drejtpërdrejtë për United në gjithë historinë e Kupave të Europës. Messi tundi dy herë rrjetën në atë takim dhe sulmuesi argjentinas u ngjit në kuotën 10 të golave në Champions. Janë plot 43 gola të shënuar nga numri 10 i Barçës në këtë sezon dhe natyrisht me një ritëm të tillë Leo është shkëputur akoma më tepër edhe nga ndjekësi i tij më i afërt Kylian Mbappe, kështu që mundësitë janë vërtet shumë të mira që Messi këtë herë të fitojë përvec “Këpucës së Artë” edhe “Topin e Artë”.
Kur mbeten edhe vetëm 6 javë deri në përfundim formacioni i drejtuar nga Ernesto Valverde ka plot 9 pikë avantazh kundrejt kundërshtarit më të afërt, që për të dytin vit radhazi nuk është Reali i Zizou-së, por bëhet fjalë për Atleticon e Diego Simeones, skuadër të cilën Barca e mposhti dy javë më parë pikërisht në Camp Nou. Të shtunën në mbrëmje në orën 20:45 “tempullin katalanas” e viziton Reali i Sociedad-it. Në fundin e vitit të kaluar drejtuesit e klubit bask shkarkuan trajnerin Asier Garitano dhe rikthyen në stol 47-vjeçarin Imanol Alguacil. Te miqtë shumë lojtarë janë në dyshim për këtë takim, për shkak të problemeve fizike, ndërkaq Barcelona në krahun tjetër do të bëjë çmos për të siguruar 3 pikët e rradhës, pasi në mesjavë në kalendar është ndeshja me Deportivo Alaves-in, prandaj është rasti për të siguruar pikët e nevojshme, për të shkuar në këtë mënyrë sa më të qetë në sfidën më të fortë të sezonit, atë ndaj Liverpoolit në Camp Nou në fund të këtij muaji.