Nuk ka pauzë në ekranin e SuperSportit, edhe pse jemi në prag të vitit të ri. Këtë të martë, duke nisur nga ora 17:00, do të transmetohet katër takime nga dy kampionate elitare, LaLiga dhe Premier League.
Në orën 19:15, në “Camp Nou”, do të zhvillohet Barcelona-Eibar, sfidë në të cilën Ronald Koeman nuk do të ketë në dispozicion Lionel Messin, i cili udhëtoi drejt Argjentinës për Krishtlindje. “Pleshti”, në fakt, do të mbërrijë në Barcelonë në mbrëmje, por për shkak të një problemi të vogël u la jashtë skuadrës nga holandezi, për ta pasur në formë optimale në fillim të vitit.
Më herët, në orën 17:00, do të transmetohet sfida Sevilla – Villareal, një përballje e fortë rivalësh për zonën Champions. “Nëndetësja e Verdhë” pati një ecuri shumë të mirë në fillim të sezonit dhe renditet në vendin e katërt me 26 pikë, ndërsa Sevilla ka tri pikë më pak, por dy ndeshje më shumë për të zhvilluar. Po nga kampionati spanjoll, në orë 21:30, do të transmetohet Levante-Betis.
Nga Premier League është përzgjedhur si ndeshja më e rëndësishme e ditës Manchester United – Wolves, që do të nisë në orën 21:00. “Djajtë e Kuq” kanë patur një ecuri shumë të mirë në tetë javët e fundit, teksa kanë regjistruar 6 fitore dhe 2 barazime. Aktualisht mbajnë vendin e katërt (27 pikë), me 5 pikë më pak se Liverpooli, por kanë një ndeshje më shumë për të luajtur. Nga ana tjetër, “ujqërit” ndodhen në mesin e tabelës me 21 pikë, me 6 fitore, 3 barazime dhe 6 humbje.
Ndeshjet në SuperSport
Sevilla – Villareal 17:00
Barcelona – Eibar 19:15
Man. United – Wolves 21:00
Levante – Betis 21:30
