Barcelona ka vendosur tashmë. Klubi katalanas në orët e ardhshme do të paraqesë një ofertë zyrtare në adresë të Paris Saint Germain për të blerë kartonin e Neymar Jr. Sipas asaj që raporton radioja katalanase RAC1 vendimi është marrë pasditen e kësaj të hëne me rastin e një takimi që kanë patur zyrtarët e anës sportive të Barcelonës me atë të anës ekonomike. Burime të brendshme pranë klubit blaugrana bëjnë me dije se të gjithë janë optimistë se ky operacion merkatoje do të realizohet me sukses. Mbetet për t’u parë se cila do të jetë oferta e Barçës për klubin parizien pasi me largimin e Coutinhos për të Bayern Munich mundësitë për të përfshirë sa më shumë lojtarë në këtë tratativë merkatoje janë më të vogla.
