Basket, Khimki M., surpriza e Euroleague-s, “bien” Barcelona dhe Anadolu Efes
Katër fitore të skuadrave vendase në ndeshjet përmbyllëse të raundit të dytë të Euroleague-s së Basketbollit. Skuadra e Valencias mposhti me rezultatin 78 – 71 Anadolu Efes, duke koleksionuar fitoren e parë sezonale pas disfatës në premierë me Khimki M. Spikati në këtë duel amerikani Green me 24 pikë, 2 asiste dhe 5 rikuperime, ndërsa skuadrës turke nuk i mjaftoi forma e mirë e serbit Stimac, që shënoi plot 22 pikë.
Triumfoi gjithashtu në ndeshjen shtëpiake Olympiakos, që iu imponua 80-75 Unicaja-s. Skuadra greke e pati gjatë gjithë kohës nën kontroll lojën, duke krijuar një shkëputje prej 10 pikësh që në periodën e parë (21-11). Në fillim të periodës së katërt kjo epërsi shkoi deri në 15 pikë, me vendasit që lëshuan terren në minutat e fundit, por pa e rrezikuar fitore, që ishte e dyta radhazi.
Crvena Zvezda, e udhëhequr nga dyshja Bjelica-Rochestie, kaloi me rezultatin 90 -82 Barcelonën, që provoi disfatën e parë pas suksesit me Panathinaikosin. Reagimi i skuadrës serbe ishte ai i duhuri pas humbjes minimale në parketin e Zalgiris Kaunas.
Tregoi forcën në këtë fillim sezoni Khimki M, që i shkaktoi humbjen e parë pikërisht Zalgiris Kaunas me shifrat 85 – 77. 24 pikët e lituanezit Jankunas nuk i mjaftuan Zalgirisit përballë debutuesve në Euroleague.