Prishtina fitoi 84-64 ndaj skuadrës holandeze Donar Groningen në takimin e parë të raundit të parë kualifikues në Basketball Champions League. Në Pallatin e Rinisë dhe të Sporteve në Prishtinë, I cili ishte mbushur me shikues, kryeqytetasit shënuan suksesin e parë në këtë kompeticion, teksa vitin e kaluar pësuan disfatë në të dyja sfidat me Tsmoki Minsk.
Duhet veçuar fakti që gjatë pjesës së parë të gjitha pikët e Prishtinës (46) u shënuan nga lojtarët e huaj. Ndërkohë kundërshtarët holandezë gabuan shume me gjuajtjet për tre, duke realizuar vetëm dy tentative.
Në pjesën e dytë Prishtina e ruajti nivelin e lojës dhe epërsia vetëm filloi të rritej gjithnjë e më tepër.
Më i dalluari në këtë fitore të Prishtinës ishte Anthony Davis Jr me 25 pikë, 9 kërcime, 2 bllokada, 1 asistim dhe 1 top të vjedhur, kurse te Groningeni u veçua Shane Hammink 11 pikë, 5 kërcime e 2 asistime.
Dueli i kthimit mes skuadrave në fjalë do të zhvillohet pas dy ditëve në Holandë, aty ku Prishtinës i mjafton edhe një humbje nën 20 pikë diferencë për të kaluar në raundin e dytë kualifikues.
