Kapiteni i Tiranës, Idriz Batha ka dalë sot në konferencën për shtyp në vigjilje të ndeshjes ndaj Bylisit, ku ka folur për punën që po bëhet nga trajneri Dede, por ka prekur edhe zhgënjimin e pësuar nga humbja e të shtunës në Shkodër
Sa ju kanë vlejtur këto pak ditë për të rikuperuar nga zhgënjimi i humbjes me Vllazninë?
Çdo ditë që kalon, është në favorin tonë, pasi kemi një trajner të ri, që po punon për të futur idetë e tij të ekip. Mendoj dhe shpresoj që të mos përsërisim të njëjtat gabime që bëmë në ndeshjen e fundit. Sa më shumë t’i afrohemi idesë së trajnerit, aq më mirë do të jetë për të gjithë.
Çfarë nuk shkoi në Shkodër?
Kjo që sapo thashë. Mendoj që kishim pak ditë në dispozicion për t’u përshtatur me stilin e ri të lojës. Megjithatë ndonëse nuk bëmë një lojë brilante, kishim mundësitë tona për ta fituar ndeshjen dhe mund t’ia kishim dalë me pak kujdes.
Çfarë strategjie keni për nesër?
Bylis është një skuadër që ka treguar se është kockë e fortë për të gjithë ekipet. Është skuadër agresive, por mendoj që do t’i marrim masat dhe shpresoj të bëhet lojë e bukur.
A keni filluar të mendoni për derbin?
Të jem i sinqertë nuk e mendoj derbin, pasi kemi 2 ndeshje finale para se të shkojmë atje. Në situatën që jemi dhe me pikët që kemi grumbulluar, nuk na lejohet ta kemi mendjen te derbi, por te ndeshjet e radhës.