Bayerni i Mynihut ka hedhur menjëherë pas krahëve humbjen në ndeshjen e parë të vitit ndaj Borussia Monchengladbach, pasi ia ka dalë të triumfojë me rezultatin e thellë 0-4 në transfertën ndaj Kolnit.
Ndonëse ende me disa mungesa për shkak të koronavirusit, gjigantët bavarezë nuk e patën aspak të vështirë të triumfojnë ndaj Koln, pasi Muller dha dy asiste për Lewandowskin dhe Tolisso, të cilët çuan shifrat në 0-2 që në minutën e 25-të.
Më pas në pjesën e dytë ishte sërish bomberi polak që shënoi edhe dy gola të tjerë, duke kompletuar suksesin 0-4 të bavarezëve dhe njëkohësisht tripletën personale, që i dha mundësi të marrë në shtëpi topin e ndeshjes.
Me këtë fitore, bavarezët e Nagelsmann ruajnë distancën e sigurisë prej 6 pikësh më shumë se Borussia Dortmund e vendit të dytë, ndërsa në garën e golshënuesve, Lewandowski është shkëputur me 6 gola më shumë se Patrick Schick që e ndjek.
Bën mjaft mirë Leipzig, nën drejtimin e trajnerit italo-gjerman, Domenico Tedesco, pasi ka arritur fitoren e dytë në po kaq ndeshje të zhvilluara në vitin 2022. Pasditen e sotme ishin Andre Silva dhe Nkunku, që shënuan, duke vulosur tre pikëshin në transfertën ndaj Stuttgartit.
Në ndeshjet e tjera, Mainz fitoi me rezultatin minimal 1-0 ndaj Bochumit, falë një goli të shënuar nga Juste në minutën e 48’, Wolfsburgu dhe Hertha e Berlinit ndanë nga një pikë falë barazimit pa gola, ndërsa Union Berlin triumfoi 2-1 ndaj Hoffenhaim.