Bayerni i Mynihut nuk ka ndërmend të ndalet, teksa sot mori një tjetër fitore dhe thelloi më tej distancën me ndjekëset. Bavarezët e Heynckesit triumfuan me rezultatin minimal 0-1 në transfertën ndaj Eintrachtit të Frankfutit, falë një goli të shënuar nga mesfushori Arturo Vidal në pjesën e parë.
Ndryshe nga Bayerni, Borusia e Dortmundit vijon me serinë e rezultateve negative, teksa nuk fiton në kampionat që nga 30 shtatori. Skuadra e Peter Bosz u mposht 1-2 nga Werder Bremeni në ‘Signal Iduna Park’ dhe krahas mbetjes jashtë luftës për titull, tani ka përfunduar edhe jashtë zonës që të çon në kupat europiane.
Leipzigu nuk arriti të ndjekë bavarezët, teksa u ndal në një barazim 2-2 në shtëpi ndaj Mainzit, duke bërë që tani distance me Bayernin kryesues të shkojë në 8 pikë. Takimi mes Hamburgut dhe Wolfsburgut nuk prodhoi asnjë gol, ndërsa titullar për vendasit ishte edhe qendërmbrojtësi i kombëtares, Mërgim Mavraj.