Gjilani ka arritur marrëveshjen me sulmuesin e krahut nga Tirana, Bedri Greca. Sulmuesi 28-vjeçar më parë ka mbrojtur ngjyrat e shumë skuadrave nga kampionati shqiptar, ku vlen të ceken eksperiencat me Flamurtarit, Kukësin dhe Luftëtarin. Greca konsiderohet një futbollist me shumë përvojë.
Edicionin e fundit, Greca ka luajtur për skuadrën e Tiranës, ku ka zhvilluar një kampionat të suksesshëm në aspektin personal, pasi ka qenë gjithmonë pjesë e formacionit startues në skuadrën e tij të udhëhequr nga kryetrajneri Ardian Mema, duke realizuar 4 gola dhe dhënë 6 asiste.
Greca bëhet transferimi i gjashtë në skuadrën e Gjilanit. Bordi drejtues i skuadrës po punon me mjaft intensitet për të sjellë edhe përforcime të tjera në kampin kuqebardhë, ku po synohet të ndërtohet një ekip konkurrues për edicionet e radhës në Superligën e Kosovës në futboll.
