Ndaj Luftëtarit në Gjirokastër, Teuta mund të kishte marrë më shumë se një barazim, gjithsesi trajneri Gentian Begeja deklaroi në “Gol pas Goli” se është i kënaqur edhe me një pikë.
Për mënyrën se si shkoi loja, mendoj se barazimi ishte rezultati më i drejtë, pavarësisht se ne kishim 2-3 raste të mira në fund. Fillimi ka qenë shumë i vështirë për ne, pasi kundërshtari na vuri në vështirësi dhe mund të kishte shënuar në disa raste.
Begeja, duke analizuar më në detaje takimin, u shpreh se kundër bluzinjve nuk mund të luhej një kundër një, pasi kanë elementë shumë cilësorë.
Ne kishim ardhur për rezultat pozitiv në Gjirokastër, ndërsa edhe barazimi mund të konsiderohet i tillë. Teuta nuk e ka luksin për të bërë një lojë sulmuese dhe duke parë elementët e kundërshtarit, kishim zgjedhur vetë këtë mënyrë loje. Ndeshjen e ndërtuam në atë mënyrë që lojtarët të mos kishin markime një kundër një, duke dubluar kundërshtarët tanë, pasi Luftëtari ka disa futbollistë me kualitete të larta. Skuadra është e përkushtuar në stërvitje, nuk është merita ime por e skuadrës dhe duhet të vazhdojmë kështu”.