Belgjika dhe Holanda konfirmuan momentin e mirë që po kalojnë duke u ndarë në një barazim 1-1 në miqësoren e luksit mes tyre. Nuk prodhoi fitues sfida e zhvilluar në Bruksel edhe pse në këtë miqësore të dy trajnerët Martinez e Koeman kishin bërë ndryshime të shumta në formacion krahasuar me takimet e fundit në Nations League ku Belgjika mposhti 2-1 Zvicrën ndërsa Holanda i dha një leksion futbolli Gjermanisë me atë fitore 3-0. Nisi menjëherë me gol sfida me Djajtë e Kuq që zhbllokuan rezultatin pas vetëm 5 minutash lojë me sulmuesin e Napolit Dries Mertens. Megjithatë për ti dhënë barazimin portokallinjëve mendoi sulmuesi anësor i Club Brugge Arnaut Groeneveld, që i asistuar nga Depay mposhti portierin Mignolet duke realizuar golin e parë me tulipanët në ndeshjen e tij të parë si titullar.Që nga minuta e 27-të kur Holanda barazoi shifrat të dyja përfaqësueset krijuan një mori rastesh por rezultati nuk ndryshoi më. Një barazim që mban me moral të lartë si Belgjikën ashtu edhe Holandën që pak nga pak po arrin të marrë vendin që i takon në arenën e futbollit europian dhe atij botëror.
