Një nga eksperiencat e shumta në karrierën e Rafale Benitez në profesionin e trajnerit, ka qenë edhe ajo në krye të Interit. Spanjolli u emërua “timonier” i zikaltërve në vitin 2010, mirëpo aventura me italianët nuk i përmbushi pritshmëritë me Benitez që u shkarkua pa e mbyllur sezonin.
Së fundmi, 62-vjeccari është rikthyer të flasë për Interin duke theksuar se gabimi i tij më i madh është fakti që pranoi të trajnonte një skuadër e cila nuk mund të bënte investime madhore në merkato si pasojë e Fair-Play financiar.
“Gabova shumë tek Inter në momentin që pranova të trajnoja skuadrën, duke mos pasur mundësinë e të bërit merkato. Në mes ishte edhe Fair Play financiar, këtë situatë më pas e vuajta edhe te Everton.
Aty kishin vite që investonin dhe shuma të mëdha, por në momentin që e mora përsipër detyrën, nuk mund të investonin më në të njëjtën formë si më parë”, u shpreh Benitez. Pikërisht, klubi i Premier League është edhe detyra e fundit në karrierë për Benitez që aktualisht nuk po e ushtron profesionin e tij.
