Etrit Berisha vijon të tregojë një formë fantastike me Spalin, por që as këtë herë nuk ka qenë i mjaftueshëm që skuadra e tij të marrë pikën e parë në kampionat.
Në sfidën e parë të javës së dytë, Bologna triumfoi me rezultatin minimal 1-0 përballë Spalit në “Dall’ Ara”, falë një goli të shënuar nga Roberto Soriano vetëm në minutën e 93-të të takimit.
Pas paraqitjes mjaft të mirë në start përballë Atalantës, Berisha bëri të njëjtën gjë edhe mbrëmjen e sotme, duke shmangur golin e vendasve në të paktën 4-5 raste, por nuk mundi të bëjë asgjë në gjuajtjen e Sorianos me kokë, me topin që shkoi në cepin e portës dhe u ndal në rrjetë.
Berisha konfirmon kështu formën e shkëlqyer dhe faktin që do të jetë një nga pikat më të forta të Spalit këtë sezon, por skuadra e tij lë shumë për të dëshiruar dhe duhet të ndryshojë për të tentuar mbijetesën.
