Luka Modriç nuk arriti të veshë fanellën e Interit, por duket se ka zgjedhur pikërisht anën e zikaltërve, në përballjen e këtyre të fundit me Realin e Madridit, në FIFA.
Florentino Perez denoncoi zikaltrit në FIFA, duke i akuzuar se kishin shkelur rregullat e merkatos, duke kontaktuar Luka Modriçin pa lejen e Realit të Madridit, që kishte kontratë me lojtarin.
Klubi zikaltër u mbrojt menjëherë, pasi në e mail-in shpjegues ndaj institucionit drejtues, ka treguar se nuk kishte pasur asnjëherë kontakte me nënkampionin e botës, por vetëm me menaxherët e tij, të cilët i ofruan Interit mundësinë e blerjes së Modriç.
Fjalën e fundit në këtë histori duket se e ka thënë vetë numri 10 i Realit të Madridit, i cili ka nxjerrë blof presidentin Perez dhe ka sqaruar se i është vetë-ofruar Interit, nëpërmjet menaxherëve të tij.
Përgjigja e Modriç për këtë situatë është publikuar nga media spanjolle Don Balon, që raporton se kroati ka treguar të njëjtën histori me zikaltrit, për këtë situatë, duke nxjerrë të pafajshëm drejtuesit e klubit italian.
Vlen të përmendet se gjatë këtyre ditëve ndaj Perezit ka pasur një lumë sulmesh për padinë ndaj Interit, pasi shumë klube i kanë kujtuar se vetë numri 1 i Realit, ka marrë Modriçin nga Tottenhami, duke arritur akordin pa miratimin e klubit anglez. Në të njëjtën mënyrë Perez është sjellë edhe kur ka marrë Mourinhon nga Interi, Courtois nga Chelsea, etj.
