Vetëm pak ditë pas fitores së thellë 2-7 në Londër ndaj Tottenhamit, Bayerni i Niko Kovaç ka zhgënjyer tërësisht në “Allianz Arena” pasditen e sotme, teksa është mposhtur me rezultatin 1-2 nga modestët e Hoffenhaimit.
Gjithçka është zhvilluar në pjesën e dytë në këtë takim, ku Adamyan ka shënuar dy herë për miqtë, ndërsa bavarezët barazuan momentalisht sfidën me anë të sulmuesit polak Robert Lewandowski, i cili është i vetmi që nuk stonon në këtë start kampionati.
E nëse bavarezët gabojnë, nuk e shfrytëzon dot këtë hap Borussia e Dortmundit, që ndonëse ishte dy herë në avantazh në transfertën ndaj Freiburgut, nuk shkoi më shumë se një barazim 2-2, me verdhezinjtë që tashmë nuk fitojnë prej 3 javësh radhazi.
Vetëm barazim 1-1 arriti edhe Bayer Leverkusen në shtëpi përballë Leipzig, ndërsa Paderborn pësoi edhe humbjen e gjashtë në 7 javë kampionat, teksa u mposht 1-2 nga Mainz dhe mbetet në vendin e fundit të renditjes.