Cristiano Ronaldo ka edhe një vit kontratë me Manchester United, ekip ku u rikthye verën e kaluar. 24 gola shënoi ylli portugez sezonin e fundit, me “Djajtë e Kuq” që u kualifikuan në Europa League.
37-vjeçari dëshiron të luajë në Champions League sezonin e ardhshëm dhe për momentin është i pakënaqur me merkaton e klubit ishullor. Portugezja Record foli për mundësinë e transferimit të pesë herë fituesit të “Topit të Artë” te Bayern Munchen.
Ronaldo shihet si zëvendësuesi i mundshëm i Robert Lewandowskit (drejt Barcelonës), por një gjë e tillë nuk do ndodhë. Agjenti Jorge Mendez i ka ofruar shërbimet e CR7 kampionëve të Gjermanisë, por pas shumë diskutimeve bavarezët kanë vendosur të mos investojnë te Ronaldo.
Shkaku kryesor lidhet me pagën e lartë sezonale që përfiton goleadori më i mirë në histori (385 mijë paund në javë), me drejtuesit e Bayernit që nuk duan të krijojnë pakënaqësi në grupin e Julian Nagelsmann.
Sky Sports UK shkruan se sulmuesi portugez do të respektojë kontratën me United, që sezonin e ardhshëm do të drejtohet nga holandezi Erik Ten Hag, ish-trajneri i Ajaksit.