Bayerni i Mynihut do të ketë mundësi t’i shtojë një tjetër trofe palmaresit, pasi nesër do të luajë finalen e Botërorit për Klube ndaj meksikanëve të Tigres.
Ndeshja do të zhvillohet në Katar, vendin pritës të këtij kompeticioni dhe do të startojë në orën 19:00, ndërsa trajneri Hansi Flick doli sot në konferencën e zakonshme për shtyp.
Tekniku gjerman i bavarezëve deklaroi se skuadra meksikane është mjaft e organizuar dhe luan futboll të bukur, ndaj paralajmëroi se do të hedhë në fushë formacionin më të mirë në ndeshjen e nesërme.
“E pashë Tigres në gjysmëfinale dhe më bëri përshtypje mënyra sesi luajtën. Ata lajnë shumë intensivisht dhe kanë shumë cilësi në krahët e sulmit. Ne do japim gjithçka nga kapaciteti ynë, do të jetë ndeshje shumë e vështirë. Jemi të lumtur që kemi arritur në finale. Do të vendosim më të mirët në fushë, pa prishur ekuilibrat. Do flasim me lojtaret dhe do te shohim”, tha Flick.
Ndërkohë mungesa e konfirmuar e bavarezëve për finalen e nesërme është ajo e mbrojtësit Jerome Boateng, i cili është kthyer menjëherë në Gjermani, pasi mësoi lajmin se ish e dashura u gjet e vdekur.
Vetë trajneri Flick pranoi se Boateng kërkoi leje për t’u kthyer dhe për t’i dhënë lamtumirën e fundit modeles 25-vjeçare Kasia Lenhardt, me të cilën ishte i lidhur deri në fillim të këtij muaji.
