Në El Monumental festoi Boca Juniors. 8 nga 8, formacioni i trajnerit Guillermo Barro Schelotto triumfoi edhe në transertën përballë rivalëve të urryer të River Plate me shifrat 2-1, duke vijuar ecurinë perfekte në këtë sezon të kampionatit argjentinas. 8 fitore në 8 javë për Bocën që me 24 pikë të grumbulluara, numëron 9 më shumë se ndjekësja më e afërt me vendin që ndahet mes Talleres Cordoba dhe San Lorenzos. Nëse vazhdon me këtë ritëm fitimi i titullit do të jetë thjeshtë cështje kohe për Boca Juniors. Në stadiumin famshëm El Monumental miqtë kaluan fillimisht në epërsi me golin e Cardonës por Ponzio 21 minuta përpara fundit barazoi shifrat, megjithatë nuk kaloi shumë dhe Nandez i dha sërish avantazhin Bocës. Si Riveri ashtu edhe Boca e mbyllën ndeshjen me nga një lojtar më pak pasi në pjesën e parë gjyqtari nxorri me karton të kuq Fernandez për vendasit ndërsa forcat në fushë u barazuan në të 61-tën pas daljes me një tjetër karton të kuq të autorit të golit të parë për Bocën, kolumbianit Cardona.
