Pasi konfirmoi Mihajloviç në stol, përtej problemeve shëndetësore të serbit, skuadra e Bolognës është përqendruar tashmë në merkato dhe ka ndërmend të krijojë një ekip që të luftojë për diçka më tepër se mbijetesa.
Kuqeblutë do të tentojnë arritjen e kupave të Europës dhe kjo duket me Mihajloviçin në stol e Sabatinin si drejtues, ndërsa në organikë po tentohet të afrohet edhe ish sulmuesi i Liverpoolit kampion Europe, Daniel Sturridge.
Anglezi 29-vjeçar nuk bënte pjesë në planet e Jurgen Klopp dhe u largua në fund të sezonit si lojtar i lirë, duke qenë se i përfundoi kontrata, ndërsa tani po kërkon një ekip ku të tentojë ringritjen, pas dëmtimeve të vazhdueshme.
Problemi i vetëm për momentin mbetet paga e lartë e Sturridge, që përfitonte rreth 4 milionë euro te “The Reds” dhe vështirë se do të pranonte transferimin në Itali, për shifra shumë më të ulëta.
Megjithatë drejtuesit e Bolognës e kanë seriozisht dhe mund të kënaqin pretendimet ekonomike të anglezit, për a sjellë në “Dall’Ara” dhe për të çuar një sinjal të qartë se kuqeblutë kanë pretendime aspak modeste për këtë sezon.