Tensionet e përplasjet mes Antonio Contes dhe drejtuesve të Juventusit gjatë ndeshjes mes bardhezinjve dhe Interit ditën e enjte, ishin një tjetër reklamë e shëmtuar për imazhin e futbollit italian.
Pikërisht për këtë arsye edhe Prokuroria Federale ka nisur një hetim për çështjen, ndërsa gazetarë të pranishëm kanë implikuar në ngjarje edhe Leonardo Bonuccin, i cili nisi replikat në distancë me Conten, pas protestave të trajnerit për një rast të dyshimtë penalltie.
Vetë mbrojtësi i Juventusit dhe Kombëtares Italiane ka dhënë një intervistë për Sky Sport, ku ndër të tjera ka pranuar se pamjet e imazhet flasin më qartë se çdo fjalë e tij, por ka shtuar se gjithçka ndodh për shkak të presionit që jep një përballje e tillë.
“nuk kam shumë për të shtuar, pasi pamjet dhe imazhet flasin më qartë se çdo gjë. Më vjen keq për gjithë sa ndodhi, pasi e di që ne duhet të jemi shembull, por presioni që shkakton një ndeshje e tillë, të bën të dalësh nga vetja. Këto janë gjëra që ndodhin shpesh në një ndeshje futbolli, por tani luhet pa tifozë dhe mikrofonët anësorë arrijnë të kapin edhe teshtimat. Tani çdo gjë duhet bërë më me kujdes, për të mos u amplifikuar”, deklaroi Bonucci.