Mjaft i zhgënjyer për humbjen e sotme ndaj kroatëve është shprehur edhe sulmuesi i Shqipërisë U-17, Kleis Bozhanaj. Sulmuesi i rritur te Internacionali në Tiranë, mendon se shqiptarët ishin të pafatë sot, sepse i patën të gjitha mundësitë për të marrë minimumi një pikë.
“Fati nuk ishte me ne sot. Bëmë më të mirën dhe mendoj se nuk duhej të humbisnim, por të paktën të kishim marrë një rezultat pozitiv. Madje, edhe mund të kishim fituar, pasi kishim edhe një rast të shkëlqyer në fundin e ndeshjes. Ne do të provojmë të marrim rezultatin pozitiv në ndeshjen e radhës me Spanjën, edhe pse këta janë kundërshtarë mjaft cilësorë. Do të jemi të përqendruar dhe do të japim më të mirën dhe shpresojmë që herën tjetër të kemi edhe fatin me vete”, tha Bozhanaj.