Gianluigi Buffon fitoi të shtunën trofeun e parë në Francë, me PSG-në ndërsa ka dhënë edhe një intervistë të gjatë për një revistë pranë klubit francez.
Ish kapiteni i Juventusit foli për ditët e para të eksperiencës së tij pariziene dhe natyrisht u ndal edhe te ylli i Francës në Botëror, Kylian Mbappe, të cilin e ka edhe shok skuadre tashmë.
“Jam i lumtur që e nismë me triumf, pasi do të na japë më shumë qetësi dhe vetëbesim në sezonin e gjatë që pritet të fillojë. Mbappe është një yll i futbollit dhe nëse qëndron me këmbë në tokë dhe përqendrohet te objektivat e tij, jam i bindur që do të arrijë në nivelet e Pele, Maradonës, Ronaldos apo Messit”, tha Buffon.
Portieri italian tregoi se e njeh mirë PSG-në dhe se skuadra do të synojë triumfin sa më shpejt të jetë e mundur, në arenën ndërkombëtare.
“Kam biseduar shpesh me Sirigun dhe Verratin, për mënyrën sesi një skuadër me kaq lojtarë të fortë, nuk ia del në momentet vendimtare të sezonit. E vërteta është se kjo skuadër është ndërtuar në 5-6 sezonet e fundit dhe për të fituar duhet traditë dhe mentalitet i fortë,. Besoj se me lojtarët dhe trajnerin e duhur, mund të synojmë suksesin”, tha portieri i PSG-së.
