Ndonëse sulmi e bëri mjaft mirë punën e tij në takimin e djeshëm të 21-vjeçarëve ndaj Sllovakisë, duket se Alban Bushi ka ndërmend t’i shtojë një tjetër futbollist këtij reparti, për sfidën e kthimit, që do të luhet më datë 27 Mars.
Trajneri i Shpresave ka thirrur në grumbullim anësorin e Vllaznisë, Erald Çinari, që do t’i bashkohet 21-vjeçarëve gjatë ditës së sotme, për t’u vënë në dispozicion të trajnerin Alban Bushi.
Mungesa e alternativave nga krahët, por edhe dëmtimi i Çekiçit gjatë takimit të djeshëm, duket se kanë bindur trajnerin Bushi, të thërrasë talentin shkodran për takimin në Sllovaki.
Erald Çinari është një titullar i padiskutueshëm i Vllaznisë së Gjokës, teksa shpesh është bërë protagonist me golat e shënuar për kuqeblutë.
