Europa League

Buzëqesh Cungu, Reginaldo drejt Gjeorgjisë

Kukësi rigjen Reginaldon. Sulmuesi nga Mozambiku më në fund ka marrë vizën për të udhëtuar drejt Gjeorgjisë, aty ku nënkampionët e vendit do të luajnë duelin e parë për raundin e tretë të Europa League me Torpedo Kutaisi.

Gjatë të gjithë ditës së sotme drejtuesit e Kukësit kanë ngritur zërin madje deri në institucionin e UEFA-s, për shkak se tre futbollistë, Valon Ethemi, Edis Maliqi dhe pikërisht Reginaldo, nuk ishin pajisur me vizën që i lejon udhëtimin drejt Tbilisit.

Por mesa duket për qendërsulmuesin procedurat janë mbyllur me shpejtësi, duke bërë që 28-vjeçari të marrë avionin për t’iu bashkuar skuadrës. Normalisht futbollisti duhet të ishte së bashku me skuadrën, madje të merte pjesë edhe në seancën e fundit stërvitore, por Armando Cungu mund të kënaqet përgjysmë.

Autori i 18 golave edicionin e kaluar në kampionat me fanellën e Laçit do të jetë një forcë më shumë në stol, pavarësisht se do t’i duhet që nga avioni të zbarkojë direkt në fushë.

Megjithatë në situatën aktuale, qëndrimi në stol i Reginaldos do të ishte një bonus për Kukësin, pasi futbollisti është stërvitur gjatë javës dhe ndoshta mund të ketë minuta për të në pjesën e dytë, pavarësisht se nuk ka qenë me skuadrën në seancën e fundit stërvitore.

To Top