Pas humbjes me Kamzën, më në fund vijnë lajme të mira për Laçin nga infermieria. Trajneri Gentian Mezani ka parë të bashkohen në skuadër lojtarët e dëmtuar, të cilët i munguan grupit në javën e fundit.
Në seancën e fundit stërvitore janë bashkuar me grupin dy mesfushorët e qendrës, braziliani Esquerda dhe Regi Lushkja, të cilët do të jenë të gatshëm për të luajtur që në mesjavë me Luftëtarin. Braziliani u dëmtua në sfidën ndaj Vllaznisë në “Loro Boriçi” më 3 dhjetor të 2017, ndërsa kavajasi pësoi një tërheqje në javën e fundit të fazës përgatitore.
Tashmë të dy janë të gatshëm duke iu bashkuar grupit në seancën stërvitore. Një tjetër lajm i mirë është ribashkimi me grupin i qendërmbrojtësit Bruno Lulaj që erdhi i dëmtuar nga Skënderbeu.
Për të parashikohet që rikthimi në fushë të jetë në kampionat ndaj Partizanit, pasi ende nuk është në ritmin e duhur për t’u aktivizuar qoftë ndaj Luftëtarit ashtu edhe ndaj Teutës.
Me këto 3 rikuperime, trajneri vlonjat i kurbinasve mund të buzëqeshë, pasi rritet cilësia në skuadër, por mbi të gjitha edhe rivaliteti ndërmjet futbollistëve, çka mbetet një element i rëndësishëm në ecurinë e një ekipi.
