Bylisi është skuadra tipike që i kushton vëmendjen maksimale Kupës së Shqipërisë, pasi nëse ka një mundësi sado minimale për të siguruar pjesëmarrjen në Europë, e ka më të lehtë t’i shkojë deri në fund këtij kompeticioni. Ballshiotët, një herë finalistë në sezonin 2012-2013, do të kenë përballë Dinamon, një emër të madh të futbollit shqiptar.
Skuadra e drejtuar nga Dovedan ka pësuar shumë ndryshime krahasuar me edicionin e kaluar, megjithatë në dy javët e para tregoi se mbetet një kundërshtar i rrezikshëm dhe që ambiciet nuk i ndryshon. Mllugja, Murataj dhe Ndreca janë pa diskutim lojtarët më të mirë dhe më me eksperiencë, por dëshira e të rinjve për t’u evidentuar është një shtysë më shumë. Dhe tek kupa si klubi dhe futbollistët shohin dritaren e duhur për ta arritur objektivin. Mallakastriotët vijnë nga një paraqitje fantastike në derbin ndaj Apolonisë në “Loni Papuçiu”, duke rikuperuar disavantazhin 2-0 për ta mbyllur në barazim 2-2. Madje ishin dhe shumë pranë fitores, duke iu referuar dhe golit të anulluar.
Në “Adush Muça” zbret Dinamo, që ka nisur projektin e rikthimit të lavdisë së dikurshme. Nga Italia ka ardhur shpëtimi i bluve, me presidentin Marco Pontrelli në krye të klubit dhe Fabrizio Camaratan ne krye të skuadrës. Mundësia më e mirë për të treguar seriozitetin e këtij projekti është një përballje me skuadrat e Superiores dhe ndaj një kundërshtari të vështirë si Bylisi. Kryeqytetasit kanë lojtarë me eksperiencë si Edvan Bakaj dhe Jetmir Sefa, por gjithashtu edhe lojtarë të huaj që shtojnë cilësinë e grupit. E përbashkëta e të dy ekipeve është se deri diku mbeten të panjohura për tifozët, duke qenë se në dy javët e para është shumë e vështirë të krijosh një fizionomi për ekipin tënd dhe akoma më e vështirë për të studiuar kundërshtarin.