Bylisi ka arritur të sigurojë 3 pikët në ndeshjen e prapambetur ndaj Shën Kollit në transfertë. Skuadra ballshiote ka fituar me rezultatin 1-2, falë golave të Hoxhajt dhe Mahmutit në minutat e 12’ dhe 16, ndërsa për vendasit ngushtoi diferencën Danaj në të 30-ën.
Me këtë fitore Bylisi shkon në kuotën e 37 pikëve dhe i afrohet edhe më shumë kreut, që mbahet nga Tirana me 41 pikë, në Grupin B të Kategorisë së Parë.
Sot u rikuperua gjithashtu edhe takimi i Grupit A të Kategorisë së parë, mes Tërbunit të Pukës dhe Erzenit. Shijakasit arritën të fitojnë me rezultatin 1-2 dhe shkuan në kuotën e 26 pikëve, por Kastrioti është vërtetë i shkëputur në këtë grup, me 41 pikë, ose 15 më tepër.
