Elton Cale ishte nga më të mirët për skuadrën e Tiranës, në fitoren 0-2 në Shkodër, ndërsa pas ndeshjes foli për emisionin “Gol pas Goli” ku tregoi për objektivat e bardhebluve dhe spektaklin e shëmtuar të tifozërisë.
Ishit protagonist në thuajse të gjithë manovrën sulmuese të skuadrës së Tiranës…
Jam thjesht një lojtar i skuadrës. Jam në gjendje të mirë dhe jam i gatshëm për të ndihmuar skuadrën duke dhënë maksimumin. Është përgjegjësi e madhe për ne. Organika e Tiranës është më e plotë dhe kemi më shumë cilësi. Duhet t’i marrim ndeshjet një nga një, pasi synimi është që Tirana të rikthehet aty ku i takon. Është një klub i madh, ndaj më vjen mirë që po kthehen dhe tifozët.
Trajneri Mema pati kritika për rastet e humbura…
Është e vërtetë, kisha një rast në pjesën e parë, për të cilin bisedova edhe me trajnerin. Trajneri më kërkoi llogari, duhet të kisha shënuar. Është normale, jemi lojtarë me kualitet dhe për këtë gjë paguhemi.
Si e komentoni sjelljen e tifozërisë shkodrane?
Kam luajtur edhe në Greqi për OFI-n, por kjo nuk ishte diçka e mirë. Për mendimin tim nuk është diçka e mirë për jo për Vllazninë, por edhe Shqipërinë. Ky nuk është imazh i mirë në asnjë stadium që hidhen shishe në fushë. Është vetëm një çështje imazhi”
