Briken Çalja ka konkurruar sot në kampionatin botëror të peshëngritjes, që po zhvillohet në Anaheim të SHBA-së. Peshëngritësi shqiptar e nisi mirë garën, pasi realizoi me sukses provat e para në secilin stil (shtytje dhe shkëputje), por dështoi në të tjera.
Shtangisti e mbylli konkurrimin në vendin e 4-t në shkëputje, me 142 kg të ngritura dhe në vendin e 5-të në shtytje, me 175 kg të ngritura, ndërsa në dygarësh u rendit i 4-ti, me 317 kg, ku vlen të përmendet se vendi i 3-të ngriti 318 kg në dygarësh.
Pra, Briken Çalja ka mbetur për vetëm 1 kg jashtë zonës së medaljeve, por gjithsesi, edhe ky rezultat mund të quhet i suksesshëm për shtangistin shqiptar.
Më herët, për Shqipërinë garoi edhe Evangjeli Veli, e cila u rendit e 8-a në botë, ndërsa sot pritet të konkurrojnë edhe Krenar Shoraj, Romela Begaj dhe Erkand Qerimaj, me shkodranin që pretendon zonën e medaljeve.
Ndërkohë, raportohet se Briken Çalja, pas përfundimit të konkurrimit nuk është ndjerë mirë dhe madje ka humbur edhe ndjenjat. Pasi u shoqërua në një klinikë të specializuar në Kaliforni, peshëngritësi shqiptar është rikthyer në gjendje normale shëndetësore.
