Fabrizio Cammarata pavarsisht humbjes ndaj Kukësit, e para për të në stolin e Apolonisë, vlerëson maksimalisht paraqitjen e skuadrës së tij. Në intervistën për “Gol pas Goli”, italiani i stolit të fierakëve, theksoi se Apoloninë e ndëshkoi ligji i pashkruar i futbollit ndërsa shtoi se skuadra e tij i ka të gjitha mundësitë për të siguruar mbijetesën. Cammaratta shtoi se pret edhe ndonjë dhuratë nga merkato.
“Ishte një ndeshje me dy fytyra. Në pjesën e parë na vunë në vështirësi dhe gjetën edhe golin. Më pas nisëm të luajmë mirë dhe gjetëm dy shtylla. Më pas skuadra bëri mirë dhe mund ta fitonim ndeshjen. Ligji i futbollit më pas të ndëshkon dhe kur nuk shënon do të pësosh. Jam i kënaqur me lojtarët sidomos edhe me pjesën e dytë për të arritur mbijetesën. Apolonia është skuadër e bukur dhe e gjallë. Por mund të kishim shënuar më parë dhe duhet të harrojmë këtë dhe të shohim për ndeshjen e radhës. Merkato? Dhuratat i mirëpres dhe do presim fundin e muajit”, u shpreh Cammaratta.
