Chelsea humbi në sfidën e parë gjysmëfinale të EFL Cup ose Carabao Cup, përballë Tottenhamit, me rezultatin minimal 1-0, falë një goli të shënuar nga harry Kane me 11-metërsh, i cili u akordua vetëm pas konsultimit me VAR-in.
Ndonëse “blutë” e Londrës e kanë edhe një mundësi më 24 Janar, për të përmbysur këtë rezultat, Maurizio Sarri u shfaq mjaft i revoltuar për mënyrën sesi erdhi kjo humbje, ndërsa zhgënjimin e tij e pati veçanërisht me VAR-in.
Në konferencën për shtyp pas ndeshjes, trajneri i Chelseat u paraqit me një lap top, ku kishte të fiksuar momentin e nisjes së aksionit që soli edhe penalltinë për Tottenhamin dhe ku dukej qartë që Kane nisej disa centimetra në pozicion jashtë loje.
Sarri ka nxjerrë në pah gabimin e arbitrave të VAR-it, që nuk panë aksionin nga fillimi, ndërsa theksoi se skuadra e tij nuk meritoi të humbte, për atë që dha në fushën e lojës dhe se fati i ndeshjes u vendos nga ai moment.