Reali i Madridit bëri detyrën në sfidën e shtëpisë me Getafen, duke fituar me rezultatin e pastër 2-0. Në derbin e vogël madrilen, “Los Blancos” shënuan nga një gol në çdo pjesë, për të nisur me këmbën e mbarë La Ligan, pas atij zhgënjimi në Superkupën e Europës me Atleticon e Madridit.
Carvajal zhbllokoi sfidën në minutën e 20-të, pasi shfrytëzoi grushtimin e gabuar të portierit mik, ndërsa në pjesën e dytë skenën e rrëmbeu Gareth Bale me një goditje vrastare brenda zonës, pasi u shërbye nga Asensio, me këtë të fundit që i rrëmbeu topin mbrojtësit kundërshtar.
Një debutim për t’u mbajtur mend i Andre Silvas te Sevilla. Portugezi realizoi tre nga katër golat e andaluzëve në fitoren 1-4 në fushën e Rayo Vallecanos. Ish-sulmuesi i Milanit meritoi të merrte në shtëpi topin e ndeshjes, pas një paraqitjeje fantastike. Në takimin e parë të luajtur këtë të diel Eibari u befasua 1-2 në shtëpi nga Huesca.
