Shtohen telashet për trajnerin e Barcelonës, Ronald Koeman, para “El Clasicos”. Të dëmtuarve tashmë të konfirmuar Pedri dhe Araújo, mund t’u shtohet edhe Jordi Alba. Anësori i majtë ka pësuar një dëmtim në këmbën e djathtë dhe sipas të gjitha gjasave nuk do të mund të japë kontributin e tij në sfidën më të ndjekur të kampionatit spanjoll.
Siç raportohet nga mediet katalane, lojtari iu nënshtrua ekzaminimeve mjekësore mëngjesin e kësaj të enjteje për të vlerësuar shkallën e dëmtimit që pësoi në sfidën e Championsit ndak Dinamos së Kievit dhe rezultatet nuk janë inkurajuese.
“Nuk e di se çfarë kam, por ka diçka …”, ishte shprehur Alba pas sfidës me ekipin rus. E vetmja zgjidhje që mbrojtësi të luajë në “El Clasico” është kryerja e një injeksioni për të minimizuar dhimbjet. Vlerësimi përfundimtar do të bëhet të shtunën.
Është e qartë se prania e Albas konsiderohet jetike për Barcelonën në krahun e majtë dhe aq më tepër në një ndeshje të profilit të lartë siç është ajo e së dielës.
Deri më sot, vetëm një lojtar është rikuperuar për të luajtur kundër Real Madridit: qendërmbrojtësi Eric Garcia.
Mbetet për t’u parë nëse Ousmane Dembélé do të arrijë të jetë gati për të dhënë kontribut ndaj Realit, kuptohet vetëm 10-15 minuta. As Kun Agüero nuk do të mund të luajë titullar, pasi i duhen më shumë minuta në këmbë për të kapur ritmin e ndeshjes. Argjentinasi ka kaluar pothuajse dy muaj e gjysmë jashtë fushës.
