I kënaqur por këmbë në tokë Bernard Challandes. Trajneri i Kosovës e pranon se nga dita në ditë po përpiqet t’i përcjellë një mentalitet fitues Kosovës për të bërë realitet ëndrrën e të gjithë kosovarëve.
“ E kishim ëndërruar këtë kualfikim dhe e arritëm. Ishte një fitore e rëndësishme sot, sepse e kërkuam me çdo kusht dhe unë personalisht jam shumë i kënaqur me paraqitjen e skuadrës. Kemi një skuadër të mirë por ajo çfarë unë përpiqem çdo ditë t’i përcjell kësaj skuadre është mentaliteti fitues, pasi është e vërtetë që këta lojtarë janë shumë të talentuar, por për të fituar ata duhet të vrapojnë më shumë, duhet të luftojnë si gladiatorë për të arritur objektiva madhorë”.
Sipas trajnerit zviceran ndaj Azerbajxhanit, Kosova funksionoi në të gjitha repartet.
“Sot të gjitha repartet ndihmuan njëri tjetrin bëmë një ndeshje të mirë në çdo aspekt, por jo sepse Azerbajxhani është një skuadër e keqe por sepse ne ishim shumë më lart se ata sot”.
Ndërkohë ai shpjegoi edhe arsyen se përse uli në stol kapitenin Ujkani duke aktivizuar në portë talentin e Manchester City-it Muric.
“Kam parë cilësi të jashtëzakonshme te Muric, është një portier që ka prespektivë dhe është e ardhmja e Kosovës. Ky ishte momenti i duhur për ta aktivizuar dhe jam i kënaqur me paraqitjen e tij. Bashkë me kapitenin Ujkani por edhe Visar Bekajn kemi tre portierë fantastikë”.