Liga e kampionëve është rikthyer sot, me ndeshjet e dyta të fazës në grupe. Vëmendja e mbrëmjes së sotme të Champions League ishte përqëndruar në Dortmund, ku ekipi vendas priste kampionët në fuqi, Real Madrid. Bale dhe Ronaldo shënuan për madrilenët, ndërsa Aubameyang rihapi ndeshjen në minutën e 53-të, por portugezi gjeti sërish golin në minutën e 79 duke vulosur fitoren 1-3.
Napoli ka mposhtur pa shumë vështirësi holandezët e Feyenoord, me rezultatin final 3-1. Insigne shënoi në pjesën e parë, ndërsa belgu Mertens dhe spanjolli Callejon shënuan në pjesën e dytë, para se Amraabat të shënonte golin e nderit. Fitore mori edhe Sevilla, e cila mposhti 3-0 modestët e Maribor, ku aktivizohet edhe mesfushori i kombëtares shqiptare, Valon Ahmedi, i cili luajti gjatë gjithë 90 minutëshit.
Tottenham fitoi pastër 0-3 në transfertën qipriote ndaj Apoel, ku Harry Kane ishte protagonist absolut, duke shënuar të tre golat e sfidës. Edhe turqit e Besiktas ia dolën të mposhtin 2-0 ekipin gjerman të Leipzig, në një takim ku ndeshja u ndërpre për pak minuta, si pasojë e ndriçimit të dobët.
Porto duket se ia ka marrë dorën Monakos, sepse ashtu si në finalen e Championsit, në vitin 2004 kur fitoi 0-3, edhe sot arriti të triumfojë me të njëjtin rezultat. City i Guardiolës nuk arriti të bëjë goleadë ndaj ukrainasve të Shakhtar Donetsk, por i mjaftuan golat e De Bruyne dhe Sterling për të marrë tri pikët. Vlen të përmendet se Aguero humbi edhe një 11 metërsh në pjesën e dytë. Philippe Coutinho u rikthye të luajë për Liverpool, pas krisjes në merkaton e verës dhe gjeti menjëherë rrjetën në Rusi, ndaj Spartak Moscow, por ekipi i Kloop nuk shkoi më shumë se një barazim 1-1.
