Pas 18 vitesh si futbollist me fanellën e Juventusit, Giorgio Chiellini është përshëndetur me tifozët bardhezi në ndeshjen e fundit sezonale në “Allianz Stadium”, ndaj Lazios mbrëmjen e djeshme.
Mbrojtësit që në gusht do të festojë ditëlindjen e 38, i skadon kontrata me bardhezinjtë në fund të sezonit dhe palët nuk e panë të arsyeshme ta zgjasin bashkëpunimin, edhe për faktin që drejtuesit e Juves kanë nisur një proces rinovimi të grupit.
Megjithatë Chiellini duket se nuk ka ndërmend ta mbyllë me futbollin e luajtur, sepse deklaroi se po merr në konsideratë një tjetër eksperiencë, këtë herë jashtë Italisë.
“Nuk e di çfarë do të bëj. Ndoshta do të marr në konsideratë një ofertë nga jashtë vendit, pasi gjithmonë më ka joshur ideja të luaj në një kampionat tjetër. Do të bisedoj me familjen time dhe besoj se do të vazhdoj, pasi kam ende për të dhënë”, tha Chiellini.
Ndërkohë mediat në Itali raportojnë se burime pranë mbrojtësit flasin për nië ofertë nga MLS-ja amerikane, të cilën vetë Chiellini dëshiron ta provojë, paa se të varë këpucët në gozhdë.