Federico Chiesa do të mbetet te Fiorentina edhe për një tjetër vit, Këtë e thotë me bindje krahu i djathtë i presidentit Commisso, Joe Barone, i cili thekson se ylli i skuadrës do të veshë sërish fanellën vjollcë, për sezonin e ardhshëm.
“Chiesa do të mbetet te Fiorentina, pa ‘nëse’ dhe ‘por’. Mezi pres ta takoj Federicon në Shtetet e bashkuara, kur të vijë me skuadrën për International Champions Cup”, tha Barone për mediat italiane.
Në fakt kohët e fundit është aluduar shumë për një interes të Juventusit ndaj sulmuesit të talentuar, madje në Itali këmbëngulin se Chiesa ka edhe një akord paraprak me bardhezinjtë, por ndryshimi i pronësisë së Fiorentinës, bëri që të prisheshin edhe planet.
Klubi vjollcë kaloi në fillim të qershorit nga vëllezërit Della Vale, te manjati italo-amerikan Rocco Commisso, i cili ka ndërmend të investojë fuqishëm, për të ngritur skuadrën në nivele të larta dhe Chiesa shihet si njeriu ideal për të udhëhequr këtë projekt.
