Diego Armando Maradona është legjendë në Argjentinë dhe kudo që i shkel këmba pritet si hero, madje edhe kur është kundërshtar. Skuadra që ai drejton, Gimnasia La Plata, do të luajë sonte, në orën 23:10, në fushën e Newells Old Boys, ekip ku El Pibe de Oro është aktivizuar në sezonin 1993-1994 (ka luajtur vetëm 5 ndeshje në kampionat).
Pak rëndësi ka nëse Diego nuk ka lënë ndonjë gjurmë si futbollist i madh në këtë skuadër, fakti që ai ka qenë pjesë e saj i bën krenarë tifozët e Newells Old Boys, të cilët i kanë rezervuar një pritje të ngrohtë. Ata i kanë shkuar poshtë dhomës së hotelit, duke brohoritur emrin e tij. Maradona doli në ballkon duke kënduar e kërcyer bashkë me ta. Një arsye më shumë për të kuptuar pse Maradona është mit në Argjentinë dhe jo vetëm.