Antonio Conte ka mbërritur dje në Milano dhe ka takuar drejtuesit e Interit, për të sistemuar detajet e fundit të kontratës që pritet ta lidhë me klubin zikaltër për 3 sezonet e ardhshme.
Siç raportohet nga mediat italiane, njoftimi për emërimin e tij në pankinën e Interit pritet të bëhet brenda kësaj jave, teksa është shtyrë për shkak të zisë në familjen e Luciano Spallettit (ka humbur vëllanë).
Më pas gjatë javës së ardhshme pritet që të bëhet edhe prezantimi zyrtari i Contes në stolin e Interit, por mediat përtej Adriatikut kanë arritur që të zbulojnë edhe listën me bashkëpunëtorët e trajnerit në stolin zikaltër.
Kështu zv. trajner do të jetë Gianluca Conte, 47-vjeçar dhe vëlla i Antonios, i cili ka qenë gjithmonë në krah të teknikut, duke u kujdesur kryesisht për video-analizat. Paolo Vanoli dhe Christian Stellini do të jenë gjithashtu pjesë e ndihmësve të Antonio Contes në aventurën zikaltër.
Specialistë të përgatitjes fizike do të jenë Costantino Coratti dhe spanjolli Julio Tous, ndërsa Tiberio Ancora do të jetë nutricionisti i skuadrës. Sa i përket trajnerit të portierëve, do të mbetet Adriano Bonaiuti, i cili punon edhe aktualisht.
