Tottenham arriti një fitore drithëruese 3-2 në fushën e Leicester City. Ekipi i Antonio Contes po humbiste 2-1 deri në minutën e pestë shtesë, por një dygolësh i Steven Bergwijn përmbysi gjithçka dhe i dhuroi një sukses të paharrueshëm ekipit londinez.
Spurs vijojnë të jenë të pathyeshëm në kampionat me Conten në stol, duke numëruar 6 fitore dhe 3 barazime. West Ham i vendit të katërt është një pikë larg, por “armata” e trajnerit italian ka luajtur tre ndeshje më pak se “Çekiçët”.
Antonio Conte nuk e fshehu lumturinë e madhe për këtë fitore, të cilën e përshkroi me këto fjalë. “Shijuam një ndeshje fantastike. Krijuam shumë raste për gol, por na mungoi fati në metrat e fundit. Humbja do të ishte e padrejtë.
Djemtë e mi treguan karakter dhe personalitet të madh, ata kishin një dëshirë të madhe për të përmbysur rezultatin. Pasi barazuam 2-2 dhamë gjithçka dhe tentuam golin e fitores, për fat ia dolëm”.
Më pas një koment për Steven Bergwijn. Mesfushori holandez gjeti dy golat e parë sezonalë në Premier League dhe Conte vlerëson shumë cilësitë e 24-vjeçarit. “Ai është një lojtar që na ofron karakteristika të ndryshme.
Steven është një futbollist krijues dhe shumë i rëndësishëm për këtë klub. Mendoj se ai është i lumtur që është me ne te Tottenham”, theksoi trajneri nga Lecce, i cili po arrin rezultate fantastike në Premier League me skuadrën e tij.
[quiz-cat id=”297408″]