COVID-19 vazhdon të mbetet një shqetësim për klubet e futbollit, veçanërisht për trajnerët e tyre të cilët herë pas here duhet të bëjnë pa element të rëndësishëm si pasojë e infektimit nga virusi i rrezikshëm. Kështu ka ndodhur së fundmi edhe me Napolin, me të kaltrit që ditën e sotme kanë mësuar se nuk do të kenë në dispozicion për ndeshjen e nesërme të kampionatit ndaj Inter, Matteo Politanon.
Fantazisti italian ka rezultuar pozitiv me COVID-19 dhe menjëherë ka nisur periudhën e karantinës për të shmangur përhapjen e infeksionit. Për fat të mirë, 28-vjeçari është në gjendje të mirë shëndetësore dhe nuk ka simptoma.
Sakaq, për Politanon ajo ndeshje e nesërme ndaj Inter mund të konsiderohej e veçantë duke qenë se në të kaluarën ai ka qenë pjesë e organikës së zikaltërve, megjithatë për të takuar në fushë ish-ekipin e tij duhet të presë për ndeshjen e dytë të sezonit.
