Ndonëse me Europën e siguruar më herët, Laçi blindoi edhe vendin e tretë të renditjes, pasi iu imponua kampiones së saposhpallur Tiranës, të cilën e mposhti me rezultatin 3-0. Trajneri Armando Cungu vlerësoi shpirtin e garës që shfaqën lojtarët e tij në fushë, për të cilët pati vetëm fjalë pozitive sot.
Keni blinduar vendin e tretë, por keni shfaqur një shpirt gare për t’u admiruar…
Faleminderit për fjalët e mira. Puna ime është e tillë, që të rri në këmbë e të orientoj skuadrën në fushë, pasi nuk mjaftojnë vetëm seancat stërvitore. Më vjen mirë që siguruam tashmë vendin e tretë, pasi ishte një obvjektiv i klubit.
Ku e fituat ndeshjen ndaj Tiranës?
E theksuat edhe ju, që Laçit nuk i mungoi për asnjë moment shpirti i garës sot. Kur ke lojatrë cilësorë dhe kjo kombinohet me dëshirën për të fituar ndeshjen, gjithçka bëhet edhe më e lehtë. Djemtë u treguan seriozë dhe profesionistë në fushën e lojës.
Në fund trajneri shkodran nuk harroi të urojë Tiranën për titullin kampion të fituar dhe mbi të gjithë ta komplimentojë trajnerin e bardhebluve Emanuel Egbo për punën e mirë të bërë gjatë këtij sezoni.
