Armando Cungu u prezantua pasditen e djeshme para lojtarëve të Kukësit dhe drejtoi seancën e parë stërvitore, në kuadër të përgatitjeve për ndeshjen e kthimit kundër maltezëve të Vallettas.
Tekniku shkodran, i cili mori vendin e Peter Pacult, i larguar vetëm dy ditë më parë, ka premtuar se do të bëjë maksimumin për të kualifikuar më tej skuadrën në kompeticionet europiane.
Në ditën e parë në pankinën e Kukësit, Cungu foli thuajse me të gjithë senatorët e skuadrës, përfshi edhe Musollin e Shametin, të cilët i ka pasur në skuadër edhe kur drejtoi verilindorët në sezonin 2012-2013.
Tekniku shkodran njeh një pjesë të mirë të këtyre futbollistëve, pasi i ka drejtuar në eksperiencat e tij si trajner, ose i ka pasur si kundërshtarë në fushat e Superiores.
Seanca ka qenë mjaft intensive dhe Cungu është munduar të përçojë sa më shpejt idetë e tij, duke përdorur natyrisht edhe ndihmën e lojtarëve të cilët e njohin mirë mënyrën e tij të punës.
Kukësi barazoi 0-0 në “Loro Boriçi” ndaj maltezëve, dhe të martën në ndeshjen e kthimit, do të synojë të fitojë, për t’u kaulifikuar për në turin tjetër të Ligës së Kampionëve.