Trajneri i Skënderbeut, Ilir Daja ishte i mendimit se barazimi në Vlorë, ishte rezultati më i drejtë, ndërsa theksoi se skuadra e tij e nisi mjaft keq pjesën e parë, ndërsa ndryshoi gjithçka në 45-minutëshin e dytë.
“Mendoj që barazimi ishte rezultati më i drejtë në këtë sfidë. Ne e nisëm shumë keq pjesën e parë, ndërsa në 45 minutat e dyta treguam forcën tonë të vërtetë dhe ndoshta me pak kujdes mund të kishim marrë edhe 3 pikët. Gjithsesi, e përsëris, barazimi ishte rezultati më i drejtë”, tha tekniku korçar.
Në lidhje me ecurinë e kampionatit dhe synimet e Skënderbeut, Daja theksoi se objektivi është i pandryshuar, pra fitimi i titullit, por bëri thirrje për përqendrim, sepse ka ende shumë pikë në lojë.
“Kampionati është i gjatë, sepse janë shumë ndeshje dhe shumë pikë në lojë, por besoj se jemi në rrugën e duhur. Edhe sot shfaqëm dy pamje, por treguam se skuadra ka mentalitet fituesi, vetëm se duhet ta tregojmë këtë mentalitet që në fillim”, tha Daja.
Trajnei i Skënderbeut anashkaloi sjelljen e Donjet Shkodrës, teksa tha se nuk e ka parë dhe se do të merret me këtë çështje gjatë javës. Daja theksoi se është i bindur që ka bërë zgjedhjet e duhura dhe nuk i ka hyrë në hak askujt, në lidhje me minutazhin.
“Nuk e kam parë reagimin e Shkodrës, por nëse është sjellë gabim, sigurisht që do ta analizojmë dhe do të marrim masat e duhura në shërbim të klimës pozitive në ekip. Unë mendoj se i kam dhënë hakun gjithsecilit, duke aktivizuar futbollistët më në formë, që mund t’i shërbejnë ecurisë pozitive të skuadrës”, tha Daja.
Trajneri i korçarëve theksoi se kjo nuk ishte data e duhur për Skënderbeun, që të zbriste në fushë, sepse kishte 4 futbollistë të grumbulluar me kombëtaret, të cilët erdhën vetëm 24 orë më herët.