Skënderbeu befasoi Laçin në shtëpi, duke i marrë 3 pikët, pas një fitoreje me përmbysje, ndërsa në përfundimit të takimit, trajneri Daja dha një intervistë për emisionin “Gol pas Goli”, ku komplimentoi skuadrën e tij për ndeshjen e bërë.
Fituat me përmbysje, pas një pjese të parë të dobët. Çfarë ju thatë futbollistëve në dhomat e zhveshjes?
E dinim që na pret një ndeshje e vështirë, pasi vinim edhe me mungesat e Turtullit e Dajës për shkak dëmtimesh, duke u detyruar të spostojmë Ditën mbrapa. Në pjesën e dytë tentuam të ndryshojmë manovrën dhe na ndihmoi goli i shpejtë, që bëri që të marrim lojën në dorë. Ishte e rëndësishme që futbollistët nuk u dorëzuan për asnjë moment, edhe pse ishin temperatura vërtetë të larta.
A keni menduar të ndryshoni modulin e lojës?
Për të kaluar te skema 4-4-2, do të duhet të vrapojmë të gjithë më shumë, për të mbuluar të gjithë fushën, por për momentin nuk kemi gjendje fizike për ta bërë këtë. Besoj se me kalimin e javëve do të mund të provojmë edhe me këtë rreshtim.
Mendoni se është më mirë që Bregut t’i lihet liri veprimi në fushë?
Jam dakord me sugjerimin dhe do ta marr parasysh, por duhet që edhe Bregu të na ndihmojë me gjerat e tjera më pas.
A prisni afrime të tjera në qendër të mbrojtjes, ku keni mungesa? Flasim për Jashanicën…
Jashanicën e njoh prej kohës dhe është një ekspert i mbrojtjes, ndaj do të ishte një kënaqësi e veçantë ta kishim në skuadër, pasi do të na jepte qetësi dhe siguri. Megjithatë të shohim.