Reali i Madridit fitoi 2-1 përballë Cadizit në “Santiago Bernabeu” në ndeshjen përmbyllëse të javës së 14-të në La Liga, duke ngushtuar në 2 pikë diferencën me Barcelonën kryesuese.
“Los Blancos” kaluan në epërsi të dyfishtë falë golit të Militaos në pjesën e parë dhe të Toni Kroosit në fraksionin tjetër, por rrezikuan disi në fund kur Cadizi ngushtoi diferencën me Perezin 8 minuta para fundit të kohës së rregullt, pas një pasigurie të Courtois.
Gjithsesi, tri pikë të merituara nga skuadra e Ancelotti, që “harron” shpejt humbjen e papritur në fushën e Rayo Vallecanos.
Rastet:
Reali i Madridit shkon i qetë mes pjesëve në dhomat e zhveshjes në ndeshjen me Cadizin në “Santiago Bernabeu”. Kampionët në fuqi të Spanjës e zhbllokuan rezultatin në minutën e 40-të me Militaon, që e shtyu topin drejt rrjetës pas pasimit të gjermanit Toni Kroos.
Pjesa e dytë u luajt e hapur, me raste në të dyja portat, por goli i radhës u shënua sërish nga futbollistët e Realit, pikërisht nga Toni Kroos me një goditje fluturimthi nga jashtë zonës.
Në minutën e 81-të diferenca u ngushtua në 2-1, pas një pasigurie të portierit Courtois.
