Përfaqësuesja e Kosovës në futboll ka fluturuar sot drejt Parmës, më Italisë, dhe është akomoduar në “NH Hotel”. Dardanët u pritën më aeroportin e Parmës nga ambasadorja e Kosovës në Romë, Lendita Haxhitasim.
Grupit të futbollistëve që udhëtuan nga Kosova në Parma iu bashkuan edhe shtatë lojtarët e tjerë: Samir Ujkani, Hekuran Kryeziu, Herolind Shala, Benjamin Kololli, Leart Paçarada, Milot Rashica dhe Elbasan Rashani, të cilët klubet nuk u kishin lejuar të udhëtonin drejt Prishtinës për shkak të Koronavirusit.
Lajm i mirë fakti që rezultatet e testeve të këtyre futbollistëve për Covid-19 kanë rezultuar negative. Kësisoj, të gjithë lojtarët janë në dispozicion të përzgjedhësit Challandes, i cili sonte në orën 18:45 do ta mbajë seancën e fundit stërvitore para përballjes së nesërme me moldavët.