Juventusi bën goditjen e parë të merkatos së verës. Bardhezinjtë kanë gjetur akordimin për afrimin e Mateo Darmian nga Manchester United. Mbrojtësi do të nënshkruajë një marrëveshje 5-vjeçare nga e cila do të përfitojë 2.5 milionë euro në sezon. Pritet që 28-vjeçari të zhvillojë shumë shpejtë vizitat mjekësore, një rit që i paraprin edhe firmës mbi kontratë.
Bardhezinjtë do të kalojnë në llogarinë e United 12 milionë euro. Kujtojmë që Darmian është rritur si futbollist në fidanishtet e Milanit e më pas është aktivzuar me Padovan, Palermon dhe Torinon. Ishte pikërisht klubi “granata” ai që për 18 milion euro e shiti kartonin e tij tek Man United në vitin 2015.
Largimet e Asamoah dhe Lischteiner po plotësohet shpejt nga drejtuesit e Juventusit, që pas Spinazolës dhe Mateo Caldarës ka mbyllur gjithçka edhe për Darmian. Ky i fundit shihet si një futbollist me mjaft vlera nga trajneri Allegri, kjo për faktin se 28-vjeçari është i aftë të luajë në të dy krahët e repartit difensiv. Në këtë mënyrë proçesi i rindërtimit të mbrojtjes duke synuar lojtarë me moshë më të re ka nisur tek kampionët e Italisë, ndërkohë që për mesfushën është gjithnjë e më pranë akordi me turko-gjermanin e Liverpoolit , Emre Can.
